parukparuk 5/29/05

paruparuk(05/29/05)

diyad pegley na ermen tan liga
no maminsan makilot so unlesa
mapalar iray maong ya mamenben
iyaliling dan singa mauges ya dagem
wala met iray naynay ya akakuliseng
singa akataway na kabelew, agaylay apseng
wala met iray aburat ed balang agew
lapud takot ya anapen so linew

say makapoy amay mananap na kasebeg
tan mangawa na gawan aliwan manepeg
o samay kemkemen mod sikandili
ta say aw-awey moy pakaskasi
lingayen moray agew ya apalabas
nonot moray panaon ya agaylay linggas
nayari kasin, in-inut ya ipawil agi
so paruparuk na puson, malikliksi