nakatandodo 6/03/05

sakbay nga agsikug ti pagay
pugsitan mi ti panangparang-ay
adda para root, adda para egges
pangpalangto tano dawa ket di umpes
haan mi pay baybay-an tay padanum
no maawan, tay mulan kasla naukom

mano nga lawas makitamon tay ling-et mo
makisalsala ti pul-oy ti angin, apo
rummuaren tay dawa a nalangto
rangrangtaen dagiti alimbubuyog ti diro
mabalin kamet nga agbanniit ti tukak
adaddiay da sirsirok ti pagay ken lugnak

no sikamet ket kapadak a mannalon
bilbilangek met no anya ti mabayadakon
bayad ti abuno, bayad ti agas
awan samet mabati uray ragas
ngem mayat latta ti riknak adingko
no makitak tay bimmalitok a dawa nakatandodo

(apo siwsiw-it ladingetek no ikaguram ti panangsurat
ko ti daniw a maipapan ti sinurat mo nga immuna;
nariing laeng dagiti rikriknak a kas pudno a mannalon,
sidadayaw manonton dalan)