Akinet Angilingwan Ka

masimsimpit ya bibil bimmuka
ula-ula toy panangaron matuwa
timmuwek, manterter so luwa
"aah!...akinet angilingwan ka"
inketket tod pagew kon manakis
kinarotkarot toy baog kon maimpis

kinaot koy bulsak, inderew koy panyok
nilinggis toak, insan mansibangot
dakulap in-inut ya mamupuyok
mareen, apaer pati pansibsibek
mandadalem na agawad imbeneg
unsasanting so aping tod leleg


malamlambot so buwek ton amamayuen
makapanangis so salitan dedengelen
agko tinundaan ya pupuyuken
agtula manketket o mankarot; akalakap
malmalet, anggapoy singaw, akapalkap
"agmoak la ititilak ta naiirapanak..."


"mgg..., para ed saray basakay ed alog na
manaoag, anggaman untan et say basbas
na ikul ko et agtokayo asabi, agak ni
akalingwan inarararok ya kadilaan"