Imbibil (5/30/05)

naaninag koy masanting mon imis
tan say kirlap na masamit mon linggis
singa akirwit so lamot na pusok, manparuk
say liket ko anggapoy makapukpuk
inkindat koy maaron liknak
abasak ed bibil mon "umpawilak"
"ilaloan ko" sikatoy inbibil
komankulirep, mantanger, diman so laen ko

diyad maamot ya banaan
kakawayanan, gilig na angalakan
wadmanak, kunwarin mankekemel
legeplegeg ed kalemaan,ag masmasel
dedengelen koy kalasakas ed tambib
nenengnengen koy galagalaw na talaib
nen singa walay alupak ya sanga
tan abagtog ya manliket ya sira

timmakdangak ya makalkalna
iimanoen kuray kaliberliber ko ra
nen biglan siplog na dagem, ambalbalingit
agak unsawan anguben, " victoria secret"
"abayag kilan manalagar", "andi met"
baton balanin nan-abet, lakap agaylay malet
"masyadoy pakaka-iliw ko la ed sika"
"untan met ed siak, sikatoy matuwa"