untan met ed sika

balibali so siplog na dagem
amamayuen toy masanting a lurem
saray manok kitikyatikyab; manuni
nen anengneng daka pinabli

kinetket koy bibilko; inyanges koy aralem
daddaisetak ya aturok na rosas kon gemgem
mantaptapewak lapur samit day imis mo
manparparok so pusok, singa nalemay so pueg ko

inderew koy rosas; maaron angub ed aping
inkirem moy matam; agaylay santing
binenbenan koy lawis mo tan maaron pirit
ninengneng moy matak; ag balot naaknit

intagar takan basbasen so gilig na baybay
kapegleyan daran unsesempet iray managsigay
inekal tay sapatos;diyad danum mankitdikitdi
ta say daluyon ambetel insan say buer makakiki

ambilunget lay sagur;akaselsel laray lamparaan
aliknak so kesaw tan eras limma tan angan
marakep so tungtungan anggad mamatanir kala
nilakap takay malet untan met ed sika