agdung-awak kadi

agdung-awak kadi 10/29/04

awan ti pagbanagan na uray iyikkis o ikagat
adalem unayen ti panakalumlum ti rigat
mariknak dagiti napudno nga un-unnoy mo kabsat
ngem nasiriben dagiti sumaruno a nagannak
saan da talyawen dagiti napalabas a panawen
no kasatno makaraman ti nam-ay, isu ti panpanunuten

napalabasen dagiti panawen nga "Filipino Laeng"
adadtoy dan a agis-isem, banbatayan datayo nga nakamulengleng
arig tayo dagiti babaonen, tedtedda ti pagbibingayan
kalabitan agap-apa tayo tano makaala ti bassit a makan
ngem uray kasta ti kasasaad tayo adi addapay ti nabati
mabang-aran pay tay rusok ko no mapa-ayusan ti basi

diyak mapabasol uray sino no anya ti gapu na
nasirsirib dagiti immay nga nagkaskasaba
ti ammok ket dagiti annak tayo ket agadal da
ta pimpiman no ti daga ti pagbiagan da
no sakit ti nakem ken tigker ti bagi ti apan tayo itangsit
mapaay tayo, sakit la ti bagi ti apan tayo maapit